Դեքսամեթազոնը պատկանում է կորտիկոստերոիդների խմբին։ Կորտիկոստերոիդները օրգանիզմում արտադրվող հորմոններ են, որոնք նպաստում են առողջության և ինքնազգացողության պահպանմանը։ Լրացուցիչ քանակությամբ կորտիկոստերոիդների ընդունումը, ինչպես օրինակ՝ Դեքսամեթազոնի, արդյունավետ միջոց է տարբեր հիվանդությունների բուժման համար, ներառյալ՝ բորբոքային գործընթացների։ Դեքսամեթազոնը վերացնում է բորբոքումը, որը հակառակ դեպքում կարող էր վատթարացնել Ձեր օրգանիզմի վիճակը։

Առավելագույն արդյունք ստանալու համար, Դուք պետք է այս դեղը կանոնավոր ընդունեք։

Դեքսամեթազոնը ներարկման ձևով կիրառվում է այն հիվանդների մոտ, ովքեր չեն կարող ընդունել դեղը դեղահատի տեսքով։ Ներերակային կամ միջմկանային ներարկման դեպքում  Դեքսամեթազոնը նվազեցնում է բորբոքումը և ճնշում իմունային համակարգը։ Այն սովորաբար օգտագործվում է հետևյալ դեպքերում՝

• Էնդոկրին հիվանդություններ

Մակերիկամների կեղևի առաջնային կամ երկրորդային անբավարարություն (այս դեպքում առաջին շարքի դեղեր հանդիսանում են հիդրոկորտիզոնը կամ կորտիզոնը։ Անհրաժեշտության դեպքում սինթետիկ անալոգները կարելի է կիրառել միներալկորտիկոիդների հետ համատեղ։ Միներալկորտիկոիդների միաժամանակյա օգտագործումը հատկապես կարևոր է երեխաների բուժման ժամանակ։)

• Ոչ էնդոկրին հիվանդություններ

Դեքսամեթազոնի ներարկման լուծույթը կարող է օգտագործվել նաև տարբեր ոչ էնդոկրին հիվանդությունների բուժման ժամանակ`

Ալերգիա և անաֆիլաքսիա

Անգիոնևրոտիկ այտուց և անաֆիլաքսիա։

Ստամոքս-աղիքային խանգարումներ

Կրոնի հիվանդություն և խոցային կոլիտ։

Վարակիչ հիվանդություններ (համապատասխան քիմիաթերապիայի հետ համատեղ)

Կորեկանման (միլիար) տուբերկուլյոզ և էնդոտոքսիկ շոկ։

Նևրոլոգիական խանգարումներ

Գլխուղեղի քաղցկեղի և նորածնային (ինֆանտիլ) սպազմերի հետևանքով առաջացած ներգանգային ճնշման բարձրացում։ Դեքսամեթազոնը կիրառվում է նաև որպես օժանդակ թերապիա՝ գլխուղեղի քաղցկեղի կամ նեյրովիրահատական միջամտությունից հետո առաջացած գլխուղեղի այտուցը վերահսկելու համար, սակայն ոչ գլխի վնասվածքի դեպքում։

Շնչառական խանգարումներ

Բրոնխիալ ասթմա և ասպիրացիոն թոքաբորբ։

Մաշկի հիվանդություններ

Թունավոր էպիդերմալ նեկրոլիզ։

Շոկ

Հարկ է նշել, որ Դեքսամեթազոնով բուժումն լրացուցիչ է, որը չի փոխարինում հիմնական ընդունված թերապիային։ Ապացուցվել է, որ Դեքսամեթազոնի կիրառումը շոկային վիճակների վաղ փուլում ունի ավելի բարձր թերապևտիկ ազդեցություն, սակայն դա չի ազդում հիվանդի ընդհանուր ապրելիության վրա։

Տեղային կիրառում

Դեքսամեթազոնի ներարկման լուծույթը հարմար է ներհոդային ներարկումների կամ փափուկ հյուսվածքների ներարկումների համար, որպես օժանդակ թերապիա՝  կարճաժամկետ կիրառման հետևյալ դեպքերում՝

Փափուկ հյուսվածքների վնասվածքներ

Դաստակային (կարպալ) թունելի համախտանիշ և տենոսինովիտ։

Ներհոդային վնասվածքներ

Ռևմատոիդ արթրիտ և օստեոարթրիտ՝ բորբոքային տարրով։

Որոշ մաշկային հիվանդությունների դեպքում, ինչպիսիք են կիստոզ ակնեն, հասարակ որքինը և կելոիդ սպիները, Դեքսամեթազոնի ներարկման լուծույթը կարող է ուղղակիորեն ներարկվել վնասվածքի օջախում։

Դեքսամեթազոնը պետք է ընդունել ճիշտ այնպես, ինչպես նշանակվել է բժիշկի կողմից։

Դեղը ներարկվում է միջմկանային, ներհոդային կամ ներջլային։ Հնարավոր է նաև ներերակային ներարկում։ Դեղաչափը կախված է հիվանդության ծանրությունից և հիվանդի վիճակից։ Ճիշտ դեղաչափը, ինչպես նաև երբ և ինչպես պետք է կատարել ներարկումը, կորոշի Ձեր բժիշկը։

Եթե Դուք ընդունել եք ավելի շատ Դեքսամեթազոն, քան խորհուրդ է տրվում

Եթե կարծում եք, որ Դուք ընդունել եք ավելի շատ Դեքսամեթազոն, քան խորհուրդ է տրվում, անմիջապես տեղեկացրեք Ձեր բուժող բժշկին։ Գերդեղաչափման դեպքում կարող եք զգալ հետևյալ ախտանիշները․

• կոկորդի այտուց,
• մաշկային ռեակցիա,
• շնչառության դժվարացում։

Քանի որ ներարկումը պետք է կատարել բժիշկի կամ բուժքրոջ կողմից, քիչ հավանական է, որ Ձեզ կներարկվի չափազանց բարձր դեղաչափ կամ բաց կթողնեք հաջորդ դեղաչափը։ Եթե կարծում եք, որ Ձեզ ներարկել են չափազանց բարձր դեղաչափ կամ բաց եք թողել հերթական դեղաչափը, անմիջապես դիմեք բժշկին։

Եթե Դուք դադարեցնում եք Դեքսամեթզոնի ընդունումը

Դեքսամեթազոնի կտրուկ դադարեցումը վտանգավոր է։ Տևական բուժումից հետո Ձեր օրգանիզմը հնարավոր է հարմարվի այս դեղի ընդունմանը և կարող է նվազեցնել կորտիկոստերոիդների նորմալ արտադրությունը։ Ձեր բուժումը կդադարեցվի՝ կախված այն հիվանդությունից, որի դեմ բուժվում եք, նաև նրանից, թե որքան Դեքսամեթազոնի ներարկում եք ստացել։ Եթե Դուք նախատեսում եք ավարտել բուժման կուրսը, հետևեք Ձեր բուժող բժշկի ցուցումներին։

Եթե Դուք կտրուկ դադարեցնեք դեղի ընդունումը, Ձեր վիճակը կարող է վատթարանալ։

Հնարավոր է, որ անհրաժեշտ լինի աստիճանաբար նվազեցնել ընդունվող դեղի դեղաչափը՝ մինչև լիարժեք դադարեցումը։ Ձեր բժիշկը պետք է համոզվի, որ բուժումից հետո հիվանդության կրկնություն չի լինի։ Եթե Դուք ենթարկվել եք ուժեղ սթրեսի (օրինակ՝ այլ հիվանդություն, վնասվածք կամ վիրահատական միջամտություն), անհրաժեշտ է փոխել դեղաչափը։

Բուժումը կտրուկ դադարեցնելու դեպքում կարող է զարգանալ «հանման համախտանիշ»։ Ախտանիշներ՝ գլխացավ, տեսողության խանգարումներ (ներառյալ՝ աչքերի ցավ կամ այտուց), սրտխառնոց կամ փսխում, տենդ, մկանների և հոդերի ցավեր, քթի այտուց, քաշի կորուստ, մաշկի քոր և կոնյուկտիվիտ։

Երկարատև բուժումից հետո դեղաչափը չափազանց արագ նվազեցնելը կարող է հանգեցնել մակերիկամների հորմոնների անբավարար արտադրման և զարկերակային ճնշման նվազման (ախտանիշներ՝ հոգնածություն, գլխապտույտ, գլխացավ, սրտխփոց)։ Ծայրահեղ դեպքերում դա կարող է հանգեցնել մահվան։ Որոշ դեպքերում դեղաչափի նվազեցման կամ դադարեցման ընթացքում առաջացել են հոգեկան վիճակի խանգարումներ — տես ստորև «Հնարավոր կողմնակի ազդեցություններ» բաժինը։

Եթե դեղի կիրառման վերաբերյալ որևէ լրացուցիչ հարցեր ունեք, պետք է դիմեք Ձեր բուժող բժշկին կամ դեղագործին։

Դեղաբանական խումբ՝ Գլյուկոկորտիկոիդներ։

АТХ կոդ՝ H02AB02

Ինչ է պարունակում 1 մլ Դեքսամեթազոնը՝

Ակտիվ նյութ՝ դեքսամեթազոն նատրիումի ֆոսֆատ, որը համարժեք է 4 մգ դեքսամեթազոն ֆոսֆատի։

Օժանդակ նյութեր՝ մեթիլպարաբեն, պրոպիլպարաբեն, դինատրիումի էդետատ, նատրիումի ցիտրատ, կիտրոնաթթու, ներարկման ջուր։

Դեղի մասին առավել մանրամասն տեղեկություն ստանալու համար սեղմեք http://pharm.cals.am/pharm/data/drug_134425/1736329537406.pdf