icon-menu
icon-menu

Արտադրանքներ

    Ամիտրիպտիլին, 25 մգ դեղահատեր

    ԴեղաձեվըԴեղահատեր

    ATC խումբՆյարդաբանություն: Հոգեբանություն

    ATC ենթախումբՀակադեպրեսանտներ

    Դեղի առևտրային անվանումըԱմիտրիպտիլին

    Դեղի միջազգային անվանումըԱմիտրիպտիլին հիդրոքլորիդ

    Ինչ է Ամիտրիպտիլին դեղը և ինչի համար է այն կիրառվում

    Ամիտրիպտիլինը պատկանում է եռացիկլիկ հակադեպրեսանտներ կոչվող դեղերի խմբին:

    Կիրառվում է.

    • Մեծահասակների մոտ դեպրեսիայի ժամանակ (մեծ դեպրեսիա)
    • Մեծահասակների մոտ նեյրոպատիկ ցավի ժամանակ
    • Մՙեծահասակների մոտ լարվածության քրոնիկական գլխացավի կանխարգելման համար
    • Մեծահասակների մոտ միգրենի կանխարգելման համար
    • 6 տարեկանից բարձր երեխաների մոտ գիշերային անմիզապահության դեպքում, վերջինիս օրգանական ծագման, օրինակ՝ սպինա բիֆիդայի և նմանատիպ խանգարումների բացառման և ոչ դեղորայքային ու դեղորայքային բուժման միջոցների, այդ թվում՝ միոռելաքսանտների և դեսմոպրեսսինի անարդյունավետության դեպքում: Այս դեղը պետք է նշանակվի միայն այն բժիշկների կողմից, որոնք ունեն քրոնիկական անմիզապահությամբ հիվանդների բուժման փորձ:

     

    Ինչ պետք է իմանալ Ամիտրիպտիլին դեղն ընդունելուց առաջ

    Մի՛ ընդունեք Ամիտրիպտիլին դեղը, եթե.

    • ունեք ալերգիա ամիտրիպտիլինի կամ դեղի ցանկացած այլ բաղադրիչի նկատմամբ (տե՛ս բաժին 6),
    • վերջերս տարել եք սրտամկանի ինֆարկտ,
    • ունեք սրտային խնդիրներ, օրինակ՝ սրտի ռիթմի խանգարում, որը երևում է էլեկտրոսրտագրության վրա (ԷՍԳ), սրտային հաղորդականության պաշարում կամ սրտի իշեմիկ հիվանդություն,
    • նախորդ 14 օրերի ընթացքում ընդունել եք ՄԱՕ արգելակիչներ,
    • ընդունել եք մոկլոբեմիդ դեղն ամիտրիպտիլինի ընդունումից 1 օր առաջ,
    • ունեք լյարդի ծանր հիվանդություններ

    Ամիտրիպտիլինը պետք է ընդունել ՄԱՕ արգելակիչների կիրառման դադարեցումից նվազագույնը 14 օր անց:

    Այս դեղն արգելվում է օգտագործել 6 տարեկանից ցածր երեխաների շրջանում:

     

    Կիրառման հատուկ հրահանգներ և նախազգուշացումներ

    Խորհրդակցեք Ձեր բժշկի կամ դեղագետի հետ նախքան Ամիտրիպտիլին դեղի օգտագործումը:

    Ամիտրիպտիլինի բարձր դեղաչափերի ընդունման դեպքում կարող է դիտվել առիթմիա և հիպոտենզիա: Սրտային հիվանդություններ ունենալու դեպքում սա կարող է արտահայտվել նաև սովորական դեղաչափերի ընդունման դեպքում:

     

    QT միջակայքի երկարացում

    Ամիտրիպտիլինի ընդունման դեպքում դիտվել է սրտային պաթոլոգիա, որը կոչվում է «QT միջակայքի երկարացում» (որը գրանցվում է էլեկտրասրտագրության վրա, ԷՍԳ) և առիթմիա (արագացված և անկանոն սրտխփոց): Տեղեկացրե՛ք Ձեր բժշկին, եթե.

    • ունեք սրտի զարկերի դանդաղեցում,
    • ունեք կամ ունեցել եք խնդիրներ, որոնց ժամանակ սիրտը չի կարողանում ապահովել օրգանիզմի բավարար արյունամատակարարում (այս վիճակը կոչվում է սրտային անբավարարություն),
    • ընդունում եք այլ դեղեր, որոնք կարող են առաջացնել սրտի խնդիրներ,
    • ունեք խանգարում, որը հանգեցնում է արյան մեջ կալիումի և մագնեզիում մակարդակի իջեցման կամ կալիումի մակարդակի բարձրացման,
    • պատրաստվում եք ենթարկվել վիրաբուժական միջամտության, քանի որ անզգայացնողների ներմուծումից առաջ կարող է առաջանալ ամիտրիպտիլինի կիրառման դադարեցման անհրաժեշտություն: Անհապաղ վիրահատական միջամտության դեպքում անեսթեզիոլոգը պետք է տեղյակ լինի ամիտրիպտիլինով բուժման մասին,
    • ունեք վահանաձև գեղձի ակտիվության բարձրացում կամ ընդունում եք վահանաձև գեղձի բուժման համար կիրառվող դեղեր:

     

    Սուիցիդալ մտքեր և դեպրեսիվ վիճակի վատացում

    Եթե ունեք դեպրեսիա՝ Ձեզ մոտ երբեմն կարող են առաջանալ սուիցիդալ մտքեր և ինքներդ Ձեզ վնասելու ցանկություն: Հակադեպրեսանտների առաջին ընդունման ժամանակ դրանք կարող են ուժեղանալ, քանի որ այդ դեղերին ժամանակ է պետք ազդեցության զարգացման համար, մոտավորապես՝ 2 շաբաթ, երբեմն, նաև՝ ավելի:

    Սա դիտվում է հատկապես այն պացիենտների մոտ, ովքեր.

    • նախկինում ունեցել են սուիցիդալ մտքեր և իրենց վնասելու ցանկություն,
    • երիտասարդ են: Կլինիկական հետազոտությունների արդյունքները ցույց են տվել, որ սուիցիդալ հակումների բարձր ռիսկ դիտվում է մինչև 25 տարեկան հոգեկան խանգարումներ ունեցող պացիենտների մոտ, ովքեր ստանում են հակադեպրեսանտներով բուժում:

    Եթե Ձեզ մոտ ի հայտ են եկել սուիցիդալ մտքեր և ինքներդ Ձեզ վնասելու ցանկություն՝ դիմեք բժշկին կամ անհապաղ դիմեք հիվանդանոց:

    Կարող է օգտակար լինել, եթե Դուք հայտնեք Ձեզ հարազատին կամ մոտ ընկերոջը, որ ունեք դեպրեսիա և խնդրեք ընթերցել այս ներդիր-թերթիկը: Դուք կարող եք խնդրել նրանց ասել Ձեզ, եթե նրանք կարծում են, որ Ձեր դեպրեսիան կամ տագնապը խորանում է կամ, եթե նկատում են վարքի փոփոխություններ:

     

    Մանիակալ դրվագ

    Մանիակալ-դեպրեսիվ հիվանդությամբ որոշ պացիենտներ կարող են մտնել մանիակալ փուլ: Սա բնութագրվում է մեծաթիվ արագ փոփոխվող գաղափարներով, հիպերթիմիայով  (կայուն բարձր տրամադրություն) և չափից ավելի ֆիզիկական ակտիվությամբ:

     

    Տեղեկացրե՛ք Ձեր բժշկին, եթե ունեք կամ վերջերս ունեցել եք առողջական խանգարումններ, հատկապես.

    • Նեղանկյուն գլաուկոմա (տեսողության կորուստ բարձր ներակնային ճնշման պատճառով),
    • Էպիլեպսիա, ջղաձգումներ կամ ցնցումներ անամնեզում,
    • Միզարձակման դժվարություններ,
    • Շագանակագեղձի մեծացում,
    • Վահանձև գեղձի հիվանդություններ,
    • Երկբևեռ խանգարում,
    • Շիզոֆրենիա,
    • Լյարդի սուր հիվանդություններ,
    • Սրտի ծանր հիվանդություններ,
    • Պիլորոստենոզ (ստամոքսաելքի նեղացում) և աղիների պարալիտիկ անանցանելիություն (աղիքային անանցանելիություն),
    • Դիաբետ, քանի որ կարող է լինել շաքարային դիաբետի դեմ կիրառվող դեղի դեղաչափի շտկման անհրաժեշտություն:

     

    Եթե Դուք կիրառում եք հակադեպրեսանտներ, օրինակ՝ սերոտոնինի ետկլանման ընտրողական արգելակիչներ, բժիշկը կարող է քննարկել Ձեր դեղի դեղաչափի փոփոխության անհրաժեշտությունը:

    Տարեցների մոտ ավելի հաճախ են դիտվում որոշակի կողմնակի ազդեցություններ, օրինակ՝ գլխապտույտ օրթոստատիկ հիպոթենզիայի դեպքում:

     

    Երեխաներ և դեռահասներ

    Դեպրեսիա, նեյրոպաթիկ ցավ, լարվածության քրոնիկական գլխացավ և միգրենի կանխարգելում

    Ամիտրիպտիլինը չպետք է նշանակել երեխաներին և 18 տարեկանից ցածր դեռահասներին, քանի որ այս տարիքային խմբի համար դեղի անվտանգությունը և արդյունավետությունը հաստատված չեն:

     

    Գիշերային անմիզապահություն

    • Նախքան ամիտրիպտիլինով բուժումը սկսելը պետք է իրականացնել ԷՍԳ՝ բացառելու համար QT միջակայքի երկարացման համախտանիշը,
    • Այս խմբի դեղերը չպետք է ընդունել հակախոլիներգիկ դեղերի հետ միաժամանակ
    • Սուիցիդալ մտքերը և վարքը կարող են զարգանալ նաև հակադեպրեսանտներով բուժման վաղ փուլում ոչ միայն դեպրեսիայի, այլև այլ խանգարումների դեպքում, գիշերային անմիզապահություն ունեցող պացիենտների մոտ պետք է պահպանել նույն նախազգուշական միջոցները, ինչ դեպրեսիայով պացիենտների բուժման ժամանակ:

     

    Ամիտրիպտիլին դեղի և այլ դեղերի միաժամանակյա կիրառում

    Որոշ դեղերը կարող են ազդել այլ դեղերի ազդեցության վրա և դա, երբեմն, կարող է առաջացնել լուրջ կողմնակի ազդեցություններ:

    Տեղեկացրե՛ք Ձեր բժշկին կամ դեղագետին, եթե ընդունում եք, վերջերս ընդունել եք կամ պատրաստվում եք ընդունել ցանկացած այլ դեղ, օրինակ.

    • Մոնոամինօքսիդազայի արգելակիչներ, ներառյալ՝ ֆենելզին, իպրոնիազիդ, իզոկարբօքսազիդ, նիալամիդ, օրտրանիլցիպրոմին (կիրառվում է դեպրեսիայի բուժման համար) կամ սելեգիլին (կիրառվում է Պարկինսոնի հիվանդության բուժման համար): Դրանք արգելվում է ընդունել Ամիտրիպտիլինով բուժման կուրսի ընթացքում
    • Ադրենալին, էֆեդրին, իզոպրենալին, նորադրենալին, ֆենիլէֆրին և ֆենիլպրոպանոլամին (կարող են պարունակվել հազի կամ մրսածության դեմ միքստուրաներում և որոշ համակցված անզգայացնողներում)
    • Բարձր զարկերակային ճնշման բուժման դեղ, օրինակ՝ կալցիումական ուղիների պաշարիչներ (օրինակ՝ դիլթիազեմ և վերապամիլ), գուանետիդին, բետանիդին, կլոնիդին, ռեզերպին և մեթիլդոֆա
    • Հակախոլիներգիկ դեղեր, օրինակ՝ Պարկինսոնի հիվանդության և ստամոքս-աղիքային խանգարումների բուժման համար կիրառվող որոշ դեղեր
    • Թիորիդազին (կիրառվում է շիզոֆրենիայի բուժման համար)
    • Տրամադոլ (ցավազրկող), նեֆոպամ կամ օպիոիդ ցավազրկողներ
    • Սնկային վարակների բուժման համար կիրառվող դեղեր (ներառյալ՝ ֆլուկոնազոլ, տերբինաֆին, կետոկոնազոլ և իտրակոնազոլ)
    • Հանգստացնող դեղեր (ներառյալ՝ բարբիտուրատներ)
    • Հակադեպրեսանտներ (այդ թվում ՝ սերոտոնինի ետկլանման ընտրողական արգելակիչներ (ֆլուօքսետին, պարօքսետին, ֆլուվօքսամին և բուպրոպիոն)
    • սրտի որոշ հիվանդությունների բուժման համար կիրառվող դեղեր (ներառյալ՝ հակաառիթմիկ դեղեր, բետա-ադրենոբլոկատորներ, ինչպիսին են՝ ամիոդարոնը, դիզոպիրամիդը, պրոպաֆենոնը)
    • ցիմետիդին (կիրառվում է ստամոքսի խոցի բուժման համար)
    • մեթիլֆենիդատ (կիրառվում է ՈւՊՀՀ-ի բուժման համար)
    • ռիտոնավիր (կիրառվում է ՄԻԱՎ-ի բուժման համար)
    • պերօրալ հակաբեղմնավորիչներ
    • ռիֆամպիցին (կիրառվում է վարակների բուժման համար)
    • ֆենիտոին և կարբամազեպին (կիրառվում է էպիլեպսիայի բուժման համար)
    • Սրոհունդ ծակոտկեն՝ դեպրեսիայի բուժման համար կիրառվող դեղաբույս
    • Թիրոիդ հորմոնների պրեպարատներ
    • Ալտրետամին (կիրառվում է չարորակ ուռուցքների որոշ տեսակների բուժման համար)
    • Դիսուլֆիրամ (կիրառվում է ալկոհոլային կախվածության բուժման համար)
    • Բակլոֆեն (միոռելաքսանտ)
    • Ինհալացիոն կամ ենթալեզվային տիպի ստենոկարդիայի բուժման համար կիրառվող դեղեր (ներառյալ՝ նիտրոգլիցերին, իզոսորբիդ դինիտրատ)
    • Սիբուտրամին (ախորժակի ճնշման համար)
    • Վալպրոաթթու

     

    Բացի այդ՝ տեղեկացրեք Ձեր բժշկին, եթե ընդունում եք, վերջերս ընդունել եք կամ պետք է ընդունեք դեղեր, որոնք կարող են ազդել սրտի ռիթմի վրա, այդ թվում.

    • Սրտի զարկերի խանգարման բուժման համար կիրառվող դեղեր (ներառյալ խինիդին և սոտալոլ)
    • Աստեմիզոլ և տերֆենադին (կիրառվում են ալերգիկ ռեակցիաների և խոտային տենդի բուժման համար)
    • Որոշ հոգեկան հիվանդությունների բուժման համար կիրառվող դեղեր (ներառյալ պիմոզիդ և սերտինդոլ)
    • Ցիզապրիդ (կիրառվում է ստամոքսի որոշ խանգարումների բուժման համար)
    • Գալոֆանտրին (կիրառվում է մալյարիայի բուժման համար)
    • Մետադոն (կիրառվում է ցավի վերացման և նարկոտիկ դետոքսիկացիայի համար)
    • Միզամուղներ (ներառյալ ֆուրոսեմիդ)

    Եթե Դուք պլանավորում եք ենթարկվել վիրաբուժական միջամտության տեղային և ընդհանուր անզգայացնողների կիրառմամբ, տեղեկացրե՛ք Ձեր բժշկին, որ ընդունում եք այս դեղը:

    Բացի դրանից՝ Դուք պետք է տեղեկացնեք ատամնաբույժին, որ ընդունում եք այս դեղը նախքան տեղային անզգայացնողի օգտագործումը:

     

    Ամիտրիպտիլին դեղի կիրառումն ալկոհոլի հետ

    Խորհուրդ չի տրվում օգտագործել ալկոհոլ այս դեղով բուժմանը զուգընթաց, քանի որ դա կարող է մեծացնել սեդատիվ ազդեցությունը:

     

    Կիրառումը հղիության և կրծքով կերակրման շրջանում

    Եթե Դուք հղի եք, կերակրում եք կրծքով, կարծում եք, որ հղի եք կամ պլանավորում եք հղիություն, խորհրդակցեք այդ մասին Ձեր բժշկի հետ:

    Ամիտրիպտիլին դեղը խորհուրդ չի տրվում օգտագործել հղիության ժամանակ, եթե Դուք և Ձեր բժիշկը չեք քննարկել դեղի կիրառման ռիսկերը և առավելությունները:

    Եթե Դուք ընդունում եք այս դեղը հղիության վերջին եռամսյակում, պետք է իմանաք, որ Ձեր նորածին երեխայի մոտ կարող են դիտվել հետևյալ կողմնակի ազդեցությունները՝ դյուրագրգիռ վիճակ, մկանային գերլարվածություն, տրեմոր, ոչ կանոնավոր շնչառություն, չցանկանալն ընդունել հեղուկներ, բարձր լացը, միզապահությունը և փորկապությունը:

    Ձեր բժիշը խորհուրդ կտա սկսել/շարունակել/դադարեցնել կրծքով կերարկումը կամ դադարեցնել այս դեղի կիրառումը Ձեր երեխայի համար կրծքով կերակրման օգուտը և Ձեզ համար բուժման օգուտը հաշվի առնելով:

     

    Ազդեցությունը ուշադրություն պահանջող գործողությունների վրա (փոխադրամիջոցների վարում, սարքավորումների հետ աշխատանք)

    Դեղը կարող է առաջացնել քնկոտություն, գլխապտույտ, հատկապես՝ բուժման սկզբում: Անթույլատրելի է մեքենա վարելը կամ մեխանիզմների հետ աշխատանքը, եթե դեղը Ձեզ վրա ունի բացասական ազդեցություն:

     

    Ամիտրիպտիլինի բաղադրատարրերի վերաբերյալ կարևոր տեղեկություն

    Ամիտրիպտիլին դեղահատերը պարունակում են լակտոզա

    Եթե Ձեզ տեղեկացրել են, որ ունեք որոշ շաքարների անտանելիություն՝ նախքան այս դեղն ընդունելը դիմեք բժշկին:

     

    Ինչպես ընդունել Ամիտրիպտիլին դեղը

    Ամիտրիպտիլին դեղը պետք է ընդունել ճիշտ այնպես, ինչպես նշանակված է բժշկի կողմից: Եթե Դուք ունեք ինչ-որ կասկածներ, կարող եք խորհրդակցել Ձեր բժշկի կամ դեղագետի հետ:

     

    Դեղաչափման ոչ բոլոր սխեմաներն են հնարավոր դեղի տարբեր դեղաձևերի և դեղաչափերի դեպքում:

    Դեղի թողարկան ձևը և դեղաչափը պետք է ընտրվեն սկզբնական և հետագա աճող դեղաչափերին համապատասխան:

     

    Դեպրեսիա

    Մեծահասակներ.

    սկզբնական դեղաչափը կազմում է 25 մգ օրական երկու անգամ: Կախված կլինիկական ազդեցությունից՝ դեղաչափը կարող է հասնել օրական 150 մգ-ի՝ բաժանված երկու ընդունումների միջև:

     

    Տարեց պացիենտներ (65 տարեկանից բարձր) և սիրտ-անոթային հիվանդություններ ունեցող պացիենտներ

    Նախնական դեղաչափը կազմում է 10-25 մգ օրական: Կախված կլինիկական ազդեցությունից դեղաչափը կարող է հասնել օրական 100  մգ-ի՝ բաժանված երկու ընդունումների միջև: Եթե Դուք ընդունում եք 100 մգ- 150 մգ դեղաչափով՝ հնարավոր է, որ կա բժշկի հետ ավելի հաճախ խորհրդակցելու անհրաժեշտություն:

     

    Կիրառումը երեխաների և դեռահասների շրջանում

    Ամիտրիպտիլինը խորհուրդ չի տրվում կիրառել երեխաների և դեռահասների շրջանում՝ դեպրեսիայի բուժման համար: Հավելյալ տեղեկատվության համար տե՛ս բաժին 2:

     

    Նեյրոպաթիկ ցավեր, լարվածության քրոնիկական գլխացավեր և միգրենի կանխարգելում

    Ձեր բժիշը կընտրի ճիշտ դեղաչափը՝ ըստ ախտանիշների և բուժման նկատմամբ օրգանիզմի պատասխան ռեակցիայի:

     

    Մեծահասակներ.

    Սկզբնական դեղաչափը կազմում է 10-25 մգ՝ երեկոյան:

    Օրական դեղաչափը կազմում է 25-75 մգ:

     

    Կախված կլինիկական ազդեցությունից՝ դեղաչափը կարող է աստիճանաբար բարձացվել: Եթե Դուք ընդունում եք օրական 100 մգ-ից ավելի՝ հնարավոր է ունենաք բժշկի հետ ավելի հաճախ խորհրդակցությունների կարիք: Ձեր բժիշկը կորոշի՝ ընդունել դեղը օրական մեկ անգամ, թե բաժանել դեղաչափը 2 ընդունումների միջև:

     

    Տարեց պացիենտներ (65 տարեկանից բարձր) և սիրտ-անոթային հիվանդություններ ունեցող պացիենտներ

    Սկզբնական դեղաչափը կազում է 10-25 մգ երեկոյան: Կախված դեղի կլինիկական ազդեցությունից այն կարող է բարձրացվել:

    Եթե Դուք ընդունում եք օրական 75 մգ-ից ավելի ՝ կարող է լինել բժշկի հետ ավելի հաճախ խորհրդակցելու անհրաժեշտություն:

     

    Կիրառումը երեխաների և դեռահասների շրջանում

    Ամիտրիպտիլինը խորհուրդ չի տրվում ընդունել երեխաներին և դեռահասներին՝ նեյրոպաթիկ ցավի, լարվածության քրոնիկական գլխացավի և միգրենի կանխարգելման համար:

     

    Գիշերային անմիզապահություն

    Ընդունումը երեխաների և դեռահասների շրջանում

    Խորհուրդ տրվող դեղաչափը երեխաների համար.

    • 6 տարեկանից ցածր երեխաներ
    • 6-10 տարեկան երեխաներ՝ 10-20 մգ օրական: Այս տարիքային խմբում կիրառվում են համախատասխան թողարկան ձևեր
    • 11 տարեկանից բարձր երեխաներ՝ 25-50 մգ:

     

    Դեղաչափը պետք է բարձրացնել աստիճանաբար:

    Պետք է ընդունել դեղը քնելուց 1 կամ 1 ու կես ժամ առաջ:

    Նախքան բուժումը սկսելը՝ բժիշկը պետք է անցնացնի ԷՍԳ՝ հայտնաբերելու համար սրտի զարկերի խանգարումների նշանները:

    Ձեր բժիշկը կանցկացնի օրգանիզմի վիճակի կրկնակի գնահատում բուժման 3 ամիսներից հետո և կանցկացնի կրկնակի ԷՍԳ՝ ըստ անհրաժեշտության:

    Մի՛ դադարեցրեք դեղի ընդունումն առանց բուժող բժշկի հետ խորհրդակցելու:

     

    Պացիենտների հատուկ խմբեր

    Լյարդային հիվանդություններ ունեցող պացիենտներին, ովքեր հայտնի են որպես «դանդաղ մետաբոլիզատորներ» սովորաբար նշանակում են ավելի ցածր դեղաչափեր:

    Ձեր բժիշկը կարող է վերցնել արյան նմուշներ՝ որոշելու համար ամիտրիպտիլինի մակարդակը:

     

    Ինչպես և երբ ընդունել Ամիտրիպտիլին

    Դեղը պետք է ընդունել ուտելու ժամանակ կամ ուտելուց հետո:

    Դեղահատերը պետք է կուլ տալ ամբողջությամբ՝ ջրով: Չծամե՛լ:

     

    Բուժման ժամանակահատվածը

    Խորհուրդ չի տրվում փոփոխել դեղի դեղաչափը կամ դադարեցնել դրա ընդունումն առանց բժշկի հետ խորհրդակցելու:

     

    Դեպրեսիա

    Ինչպես դեպրեսիայի բուժման համար կիրառվող այլ դեղերի դեպքում՝ այս դեպքում ևս կարող է անհրաժեշտ լինել մի քանի շաբաթ՝ նախքան Դուք կզգաք վիճակի որևէ բարելավում:

    Դեպրեսիայի բուժման դեպքում բուժման տևողությունն անհատական է, սովորաբար՝ 6 ամսից ոչ պակաս: Բուժման տևողությունը որոշում է Ձեր բժիշկը:
    Շարունակեք Ամիտրիպտիլին դեղի ընդունումն այնքան ժամանակ, որքան նշանակված է Ձեր բժշկի կողմից: Հիվանդությունը կարող է պահպանվել երկար ժամանակ: Եթե դադարեցնեք բուժումը ժամանակից շուտ՝ հիվանդության ախտանիշները կարող են կրկնվել:

     

    Նեյրոպաթիկ ցավեր, լարվածության քրոնիկական գլխացվեր և միգրենի կանխարգելում

    Կարող է պահանջվել մի քանի շաբաթ՝ նախքան Ձեր վիճակի բարելավումը:

    Խորհրդակցեք բուժող բժշկի հետ բուժման տևողության վերաբերյալ և շարունակեք դեղի ընդունումն այնքան ժամանակ, քանի դեռ բժիշկը չի չեղարկել այն:

     

    Գիշերային անմիզապահություն

    Դեղի ընդունման 3 ամիսներից հետո բժիշկը կորոշի բուժումը շարունակելու անհրաժեշտությունը:

     

    Եթե գերազանցել եք դեղաչափը՝ ավելի շատ դեղահատ եք ընդունել, քան թույլատրելի է Եթե Դուք ընդունել եք ավելի շատ Ամիտրիպտիլին, քան նշանակված է բժշկի կողմից, անհրաժեշտ է անհապաղ դիմել բժշկին կամ մոտակա հիվանդանոցի անհետաձգելի բուժօգնության բաժանմունք, անգամ, որևէ անհարմարության զգացման և թունավորման ախտանիշների բացակայության դեպքում: Վերցրեք Ձեզ հետ դեղի տուփը, եթե դիմում եք բժշկին կամ հիվանդանոց:

     

    Գերդեղաչափման ախտանիշները ներառում են.

    • բբերի լայնացում
    • հաճախացած կամ անկանոն սրտխփոց
    • միզարձակման դժվարություն
    • բերանի խոռոչի կամ լեզվի մակերեսի չորություն
    • աղիքային անանցանելիություն
    • ցնցումներ
    • տենդ
    • տագնապ
    • շփոթվածություն
    • հալյուցինացիաներ
    • անկառավարելի շարժումներ
    • զարկերակային ճնշման իջեցում, թույլ պուլս, գունատություն
    • շնչառության դժվարացում
    • մաշկի կապտածություն
    • սրտի կծկումների հաճախականության նվազում
    • քնկոտություն
    • գիտակցության կորուստ
    • կոմա
    • տարբեր սրտային հիվանդություններ, օրինակ՝ սրտային հաղորդականության պաշարում, սրտային անբավարարություն, հիպոթենզիա, կարդիոգեն շոկ, մետաբոլիկ ացիդոզ, հիպոկալեմիա

     

    Եթե Դուք մոռացել եք ընդունել Ամիտրիպտիլին դեղը

    Ընդունեք հաջորդ դեղաչափը սովորական ժամին: Մի՛ ընդունեք դեղի կրկնակի դեղաչափ՝ բաց թողնվածի փոխարեն:

     

    Եթե Դուք դադարեցրել եք Ամիտրիպտիլին դեղի ընդունումը

    Ձեր բժիշկը կորոշի՝ երբ և ինչպես դադարեցնել բուժումը՝ անցանկալի ախտանիշներից խուսափելու համար, որոնք կարող են առաջանալ դեղի ընդունման կտրուկ դադարեցման դեպքում (օրինակ՝ գլխացավ, վատ ինքնազգացողություն, անքնություն և դյուրագրգիռ վիճակ):

    Եթե Դուք ունեք լրացուցիչ հարցեր դեղի ընդունման հետ կապված՝ դիմեք Ձեր բժշկին կամ դեղագետին:

     

    Ինչպիսի կողմնակի ազդեցություններ կարող են առաջանալ

    Ինչպես բոլոր դեղերը՝ Ամիտրիպտիլինը ևս կարող է առաջացնել կողմնակի երևույթներ, չնայած դրանք ոչ բոլորի մոտ են արտահայտվում:

    Անհապաղ դիմեք Ձեր բժշկին, եթե ունեք հետևյալ կողմնակի ազդեցություններից որևէ մեկը.

    Շատ հազվադեպ (>1/10000)

    Տեսողության պարբերական խանգարման երևույթներ, տեսողության «ծիածանավորում» (տեսադաշտում ծիածանի շրջանակների առկայություն լույսի աղբյուրի շուրջ) և ցավ աչքերում:

    Դուք պետք է անհապաղ անցնեք տեսողության հետազոտություն՝ նախքան այս դեղով բուժումը սկսելը: Սա կարող է լինել սուր գլաուկոմայի ախտանիշ:

     

    Հազվադեպ (>1/1000)

    • Սուր փորկապություն, որովայնի փքվածություն, տենդ և փսխում: Այս ախտանիշները կարող են կապված լինել պարալիտիկ աղիքային անանցանելիության հետ:
    • Մաշկի և աչքերի սպիտակուցների դեղնություն (դեղնախտ): Հնարավոր է, որ Դուք ունեք լյարդի ախտահարում:
    • Կապտուկներ, արյունահոսություն, գունատություն կամ կոկորդի մշտական ցավ և տենդ: Այս ախտանիշները կարող են լինել արյունաստեղծման համակարգի (ոսկրածուծի) ախտահարման առաջին նշանները: Արյունաստեղծման համակարգի վրա ազդեցությունը կարող է արտահայտվել էրիթրոցիտների (թթվածին տեղափոխողների), լեյկոցիտների (օգնում են պայքարել վարակի դեմ) և թրոմբոցիտների (մասնակցում են արյան մակարդմանը) քանակի նվազումը:
    • Սուիցիդալ մտքեր և վարք:

     

    Հաճախ (>1/10)

    Սրտի հիվանդություն, որը կոչվում է «QT միջակայքի երկարացում» (որը արտահայտվում է ԷՍԳ-ն վրա:

    Ներքոնշյալ կողմնակի երևույթները դիտվել են հետևյալ հաճախականությամբ.

     

    Շատ հաճախ (> 1/10)

    • Քնկոտություն
    • Ձեռքերի և մարմնի այլ հատվածների դող
    • Գլխապտույտ
    • Գլխացավ
    • Անկանոն, արտահայտված կամ հաճախացած սրտխփոց
    • Գլխապտուտ կանգնելիս՝ զարկերակային ճնշման իջեցման պատճառով (օրթոստատիկ հիպոտենզիա)
    • Բերանում չորություն
    • Փորկապություն
    • Սրտխառնոց
    • Ուժեղացած քրտնարտադրություն
    • Քաի ավելացում
    • Անհասկանալի կամ դանդաղ խոսք
    • Ագրեսիվություն
    • Քթի փակվածություն

     

    Հաճախ (>1/10)

    • Գիտակցության մթագնում
    • Սեռական խանգարումներ (սեռական ցանկության նվազում, էրեկցիայի հետ կապված խնդիրներ)
    • Ուշադրության խանգարում
    • Համի փոփոխություն
    • Ծակծկոցներ կամ թմրածություն ձեռքերում և ոտքերում
    • Կոորդինացիայի խանգարում
    • Բբերի լայնացում
    • Սրտի բլոկադա
    • Հոգնածություն
    • Արյան մեջ նատրիումի ցածր մակարդակ
    • Դյուրագրգիռ վիճակ
    • Միզարձակման դժվարություններ
    • Ծարավի զգացում

     

    Ոչ հաճախ (>1/100)

    • Անհանգստություն, քնի խանգարում, գիշերային մղձավանջներ
    • Ջղաձգումներ
    • Աղմուկ ականջներում
    • Զարկերակային գերճնշում
    • Փորլուծություն, փսխում
    • Մաշկային ցան, եղնջացան, դեմքի և լեզվի այտուցվածություն
    • Միզարձակման դժվարություններ
    • Կրծքի կաթի արտադրության կամ արտազատման մեծացում կրծքով կերակրման բացակայության դեպքում
    • Աչքի ճնշման բարձրացում
    • Կոլլապս
    • Սրտային անբավարարության վատացում
    • Լյարդի ֆունկցիայի խանգարում (օրինակ՝ լյարդի խոլեստատիկ հիվանդություն)

     

    Հազվադեպ (>1/1000)

    • Ախորժակի վատացում
    • Զառանցանք (հատկապես տարեց պացիենտների մոտ), հալյուցինացիաներ (հատկապես՝ շիզոֆրենիա ունեցող պացիենտների մոտ)
    • առիթմիա
    • թքագեղձերի բորբոքում
    • մազաթափություն
    • արևի լույսի նկատմամբ գերզգայունություն
    • գինեկոմաստիա
    • տենդ
    • քաշի կորուստ
    • լյարդի ֆունկցիայի թեստերի նորմայից շեղում

     

    Շատ հազվադեպ (1/10000)

    • Կարդիոմիոպատիա
    • Ներքին անհանգստության զգացում և մշտական շարժման մեջ լինելու անդիմադրելի անհրաժեշտություն
    • Ծայրամասային նյարդային համակարգի խանգարումներ
    • Ներակնային ճնշման կտրուկ բարձրացում
    • Սրտի ռիթմի խանգարման սպեցիֆիկ ձևեր («պիրուետ» տիպի պոլիմորֆ փորոքային հաճախասրտություն)
    • Ալերգիկ ալվեոլիտ

     

    Անհայտ հաճախականությամբ. կողմնակի ազդեցությունների հաճախականությունը առկա տվյալների հիման վրա հնարավոր չէ գնահատել

    • Ախորժակի կորուստ
    • Արյան մեջ շաքարի մակարդակի բարձրացում կամ նվազում
    • Թուլություն, վատ կոնցենտրացիա, կողմնորոշման խանգարում, մոլորություն, անհանգստություն, ցավ, վատ կոորդինացիա, շաղված տեսողություն, աչքերի չորություն
    • Պարանոյա
    • Շարժողական խանգարումներ (անկառավարելի շարժումներ կամ շարժումների նվազում)
    • Գերզգայունություն, սրտամկանի բորբոքում, ինֆարկտ, ինսուլտ
    • Հեպատիտ
    • Ջերմահորդանքներ
    • Ցավ ստամոքսում, բերանում խոցեր, սև «մազոտ» լեզու
    • Կաթնագեղձերի մեծացում, սեռական ցանկության կամ ֆունկցիայի փոփոխություն, հակադիուրետիկ հորմոնի արտազատման խանգարում:

     

    Այս տիպի դեղեր ընդունող պացիենտների մոտ դիտվում է ոսկրերի կոտրման բարձր ռիսկ:

     

    Այլ կողմնակի ազդեցություններ երեխաների մոտ

    • Վարքի փոփոխություններ

     

    Ինչպես պահել Ամիտրիպտիլին դեղը

    Պահել երեխաների համար անհասանելի, խոնավությունից և լույսից պաշտպանված վայրում 15-25 °C ջերմաստիճանում:

     

    Ինչ է պարունակում ամիտրիպտիլին դեղի փաթեթը եվ այլ տեղեկություն

    Ինչ է պարունակում Ամիտրիպտիլին դեղը

    1 թաղանթապատ դեղահատը պարունակում է.

    ակտիվ բաղադրատարր՝ ամիտրիպտիլինի հիդրոքլորիդ՝ 25 մգ;

    օժանդակ նյութեր.

    միջուկ՝ միկրոբյուրեղային ցելյուլոզա, լակտոզա մոնոհիդրատ, պովիդոն, եգիպտացորենի օսլա, մագնեզիումի ստեարատ, նատրիումի օսլայի գլիկոլատ, մաքրված տալկ;

    թաղանթ հիպրոմելոզ, պրոպիլեն գլիկոլ, տիտանի երկօքսիդ, մաքրված տալկ, դեղին ներկանյութ (ռիբոֆլավին):

     

    Ինչ տեսք ունեն Ամիտրիպտիլին դեղի դեղահատերը և ինչ է պարունակում փաթեթը

    Դեղին, թաղանթապատ, երկուռուցիկ դեղահատեր:

    24-ական դեղահատ պարունակող 2 բլիստերները (48 դեղահատ) տեղադրված են ստվարաթղթե տուփի մեջ ներդիր-թերթիկի հետ միասին:

     
    Դեղատնից բաց թողնելու կարգ

    Բաց է թողնվում դեղատոմսով: