Դեղի անվանումը՝ Բենզիլ բենզոատ: Այն սպիտակ, յուրահատուկ հոտով կիթ է: Բենզիլ բենզոատ 25% կիթ դեղի ակտիվ բաղադրիչը հանդիսանում է բենզիլ բենզոատը 25% ծավալային կոնցենտրացիայով։ Այն կիրառվում է քոսի և գլխի կամ հագուստի ոջիլի բուժման համար:

Քոսը մաշկի վրա մշտապես քոր առաջացնող ցան է, որը առաջանում է տիզով մաշկի ախտահարմամբ։ Քորը սրվում է լոգանքից հետո և գիշերը: Քոսը լայնորեն ախտահարում է բոլոր ռասաների և սոցիալական շերտերի ներկայացուցիչներին։

Ոջլոտությունը բավականին տարածված խնդիր է դպրոցահասակ երեխաների մոտ աշխարհի տարբեր տարածաշրջաններում։ Բոլոր տարիքային խմբերի կանայք ավելի հաճախ են վարակվում, քան տղամարդիկ։ Մազերի երկարության և վարակման հաճախության միջև որևէ ուղիղ կապ չի հայտնաբերվել։

• Քոսի բուժում

Կիթը 2 գիշեր անընդմեջ մանրակրկիտ քսում են ամբողջ մարմնին՝ սկսած ոտքերից՝ տարածելով ամբողջ մաշկի ծածկույթներով՝ բացառելով գլուխն ու պարանոցը։ Քսելուց հետո կիթը թողնում են 8–12 ժամ յուրաքանչյուր գիշեր, որից հետո գործողությունը կարելի է կրկնել 7 օր անց։ Գլխի, դեմքի և/կամ պարանոցի ախտահարման դեպքում դեղը օգտագործելուց առաջ անհրաժեշտ է մասնագետի խորհրդատվություն։ Յուրաքանչյուր կիրառումից հետո անհրաժեշտ է մանրակրկիտ լվացվել, ամբողջությամբ փոխել հագուստը և անկողնային պարագաները։ Շփման մեջ եղած բոլոր հագուստներն ու անկողնային պարագաները պետք է լվացվեն և/կամ հատուկ մշակման ենթարկվեն։

• Ոջլոտության բուժում

Քսեք ախտահարված հատվածներին և թողեք 24 ժամ, այնուհետև մանրակրկիտ լվացվեք։ Ծանր դեպքերում գործողությունը անհրաժեշտ է կրկնել 2 կամ 3 անգամ՝ 7 և 14 օր հետո։ Անհրաժեշտ է մանրակրկիտ լվացվել՝ ամբողջությամբ փոխելով հագուստը և անկողնային պարագաները։ Բոլոր շփման մեջ եղած հագուստներն ու անկողնային պարագաները պետք է լվացվեն և/կամ անցնեն հատուկ մշակում։

• Երեխաներ և նորածիններ

Բենզիլ բենզոատ կիթի կիրառումը տվյալ տարիքային խմբում հնարավոր է միայն նոսրացման դեպքում. մեծ տարիքի երեխաների համար հավասար քանակի ջրով (1:1) և նորածինների համար 3 մաս ջրով (1:3):

Եթե Դուք կիրառել եք ավելի շատ Բենզիլ բենզոատ, քան անհրաժեշտ է

Թունավորման բուժումը ներառում է ասպիրացիա և ստամոքսի լվացում, ինչպես նաև համապատասխան ախտանշանային միջոցառումներ:

Եթե Դուք բաց եք թողել Բենզիլ բենզոատի կիրառման հերթական գործողությունը

Քսեք, երբ հիշեք:

Դեղաբանական խումբ – էկտոպարազիտիցիդ, ներառյալ քոսի դեմ դեղեր:

ԱԲՔ կոդ – P03AX01:

Ինչ է պարունակում Բենզիլ բենզոատը

1 մլ կիթը պարունակում է.

ակտիվ նյութ՝ բենզիլ բենզոատ – 250 մգ

օժանդակ նյութեր՝  ստեարինաթթու, եռէթանոլամին, պրոպիլենգլիկոլ, գլիցերին, մեթիլպարաբեն, պրոպիլպարաբեն, մաքրված ջուր։

Դեղի մասին առավել մանրամասն տեղեկություն ստանալու համար սեղմեք՝ http://pharm.cals.am/pharm/data/drug_134425/1736329537406.pdf