Կլոբետազոլ դեղի ակտիվ նյութը կլոբետազոլի պրոպիոնատն է: Այն պատկանում է ստերոիդներ կոչվող դեղերի խմբին: Նվազեցնում է այտուցվածությունը և մաշկի գրգռվածությունը:

Կլոբետազոլը նշանակում են մաշկի որոշակի ախտահարումների դեպքում՝ կարմրության և քորի վերացման համար: Այդ ախտահարումներից են.

• հաճախակի ռեցիդիվող էկզեման,
• փսորիազը (բորբոքված, կարմրած մաշկի հաստացած հատվածներ, որոնք, հաճախ, պատված են արծաթագույն թեփուկներով)` բացառությամբ տարածուն բշտիկավոր փսորիազի,
• հարթ որքինը (մաշկային հիվանդություն, որն առաջացնում է քոր, կարմրա-մանուշակագույն ցանավորում դաստակների, նախաբազուկների և ստորին վերջույթների վրա)
• դիսկոիդ կարմիր գայլախտը (մաշկային հիվանդություն, որն ամենից հաճախ ախտահարում է դեմքը, ականջները և գլխամաշկը, առաջացնում է սպիներ և վնասված մաշկի գերզգայունություն արևի ճառագայթների նկատմամբ)
• Դերմատիտը և այլ մաշկային հիվանդություններ, որոնք չեն արձագանքում ավելի թույլ ստերոիդային նրբաքսուքներով և քսուքներով բուժմանը:

Մի՛ օգտագործեք Կլոբետազոլ, եթե.

• ունեք ալերգիա (գերզգայունություն) կլոբետազոլի պրոպիոնատի կամ դեղի ցանկացած այլ բաղադրիչի նկատմամբ
• 1 տարեկանից ցածր երեխաներին
• Ունեք ստորև թվարկված մաշկաբանական հիվանդություններից որևէ մեկը, քանի որ դրանց ընթացքը կարող է վատանալ.
• ակնե,
• ռոզացեա,
• բծավոր ցան բերանի շուրջը (պերիօրալ դերմատիտ),
• անալ և գենիտալ քոր,
• մաշկային վարակ այն դեպքում, եթե հիվանդությունը զուգահեռաբար չի բուժվում հակաբակտերիալ դեղերով,
• մաշկային քոր, որը չի ուղեկցվում բորբոքմամբ,
• տարածուն բշտիկավոր փսորիազ՝ բացառությամբ առանձին ախտահարումներով դեպքերի:

Մի՛ օգտագործեք Կլոբետազոլ, եթե Ձեզ մոտ դիտվում է նշված խնդիրներից որևէ մեկը: Եթե ունեք կասկածներ՝ խորհրդակցեք Ձեր բժշկի կամ դեղագետի հետ:

Խորհրդակցե՛ք Ձեր բժշկի կամ դեղագետի հետ նախքան Կլոբետազոլ դեղը կիրառելը.

• եթե ավելի վաղ ունեցել եք ալերգիկ ռեակցիաներ այլ ստերոիդների նկատմամբ,
• եթե պլանավորում եք քսել դեղը հերմետիկ վիրակապի կամ երեխայի տակդիրի տակ, քանի որ այդ դեպքում մեծանում է ակտիվ նյութի ներծծումը մաշկով: Դա կարող է հանգեցնել դեղի հավելյալ ներծծման:
• Համոզվեք, որ նոր վիրակապ դնելուց առաջ մաշկը մաքուր է՝ վարակի զարգացումը կանխարգելելու համար:
• Վնասված մաշկի կամ մաշկային ծալքերի վրա նրբաքսուքի կիրառման դեպքում:
• Մաշկի մեծ տեղամասերի վրա կիրառելու դեպքում:
• Եթե ունեք փսորիազ՝ պետք է ավելի հաճախ խորհրդակցել բժշկի հետ:
• Ոտքերի քրոնիկական խոցերի բուժման դեպքում, քանի որ հնարավոր է ալերգիկ ռեակցիայի կամ վարակի առաջացման ավելի մեծ ռիսկ:
• Աչքերի շուրջ կամ կոպերի վրա կիրառելու դեպքում, քանի որ դա կարող է դառնալ կատարակտի կամ գլաուկոմայի առաջացման պատճառ, եթե նրբաքսուքն անընդհատ ընկնում է աչքերի մեջ:
• Մաշկի նուրբ հատվածներին, օրինակ՝ դեմքին քսելու դեպքում, քանի որ Կլոբետազոլը կարող է հանգեցնել դեմքի մաշկի բարակացմանը: Դեմքի վրա կիրառման տևողությունը չպետք է գերազանցի 5 օրը: Դեմքի մաշկի վրա նրբաքսուքի կիրառման դեպքում օկկլյուզիվ վիրակապերի կամ բինտերի կիրառումը խորհուրդ չի տրվում:

Եթե վարակը զարգանում է դեղի կիրառման ընթացքում՝ խորհրդակցեք Ձեր բժշկի կամ դեղագետի հետ:

Ձեր վիճակի վերաբերյալ ցանկացած կասկածի դեպքում դիմեք Ձեր բժշկին կամ դեղագետին նախքան Կլոբետազոլ դեղն օգտագործելը:

Երեխաներ

• Չօգտագործե՛լ մինչև 1 տարեկան երեխաների շրջանում:
• Խուսափե՛ք 1 տարեկանից բարձր երեխաների շրջանում դեղի երկարատև կիրառումից, քանի որ նրանց մաշկն ավելի նուրբ է, քան մեծահասակների մոտ, ինչը կարող է մեծացնել ակտիվ նյութի ներծծումը:
• Երեխաների շրջանում կիրառումը չպետք է գերազանցի 5 օրը:
• Օկլյուզիվ վիրակապերի և բինտերի կիրառումը խորհուրդ չի տրվում այն մասերում, որտեղ քսված է նրբաքսուք:

Այլ դեղերը և Կլոբետազոլը

Տեղեկացրեք Ձեր բժշկին կամ դեղագետին, եթե ընդունում եք, վերջերս ընդունել եք կամ պատրաստվում եք ընդունել ցանկացած այլ դեղ, հատկապես՝ ռիտոնավիր և իտրակոնազոլ:

Եթե Դուք հղի եք կամ կերակրում եք կրծքով, մտածում եք, որ կարող եք հղի լինել կամ պլանավորում եք հղիություն, խորհրդակցեք Ձեր բժշկի կամ դեղագետի հետ նախքան այս դեղը կիրառելը:

Եթե Դուք օգտագործում եք այս դեղը կրծքով կերակրման շրջանում՝ մի՛ քսեք նրբաքսուքը կրծքի շրջանում, որպեսզի Կլոբետազոլը պատահաբար չդիպչի երեխայի բերանին:

Կարևոր տեղեկատվություն Կլոբետազոլի բաղադրության մեջ առկա բաղադրիչների մասին

Դեղը պարունակում է.

• Ցետոստեարիլ սպիրտ, որը կարող է առաջացնել տեղային մաշկային ռեակցիաներ (օրինակ՝ կոնտակտային դերմատիտ)
• Պրոպիլենգլիկոլ, որը կարող է առաջացնել մաշկի գրգռում
• Մեթիլպարաբեն, որը կարող է առաջացնել ալերգիկ ռեակցիաներ (հնարավոր է՝ ուշացած) և խիստ հազվադեպ՝ բրոնխոսպազմ
• Պրոպիլպարաբեն, որը կարող է առաջացնել ալերգիկ ռեակցիաներ (հնարավոր է՝ ուշացած) և խիստ հազվադեպ՝ բրոնխոսպազմ

Կլոբետազոլը պետք է օգտագործել ճիշտ այնպես, ինչպես նշանակված է բժշկի կողմից: Եթե Դուք ունեք ինչ-որ կասկածներ՝ խորհրդակցեք Ձեր բժշկի կամ դեղագետի հետ:

Կլոբետազոլի կիրառման եղանակը

• Սովորաբար Կլոբետազոլը քսում են բարակ շերտով օրական 1-2 անգամ: Կիրառման հաճախականությունը կարող է նվազել մաշկի վիճակի բարելավման դեպքում: Անհրաժեշտության դեպքում Ձեր բժիշկը կարող է նշանակել ավելի թույլ դեղ Կլոբետազոլի դեպքում:
• Եթե Դուք պլանավորում եք կիրառել փափկացնող միջոց՝ նախապես քսեք Կլոբետազոլ և թույլ տվեք, որ այն ներծծվի, և միայն դրանից հետո քսեք փափկացնող միջոցը:
• Այս նրբաքսուքը նախատեսված է միայն մաշկին քսելու համար:
• Մի՛ օգտագործեք Կլոբետազոլը 4 շաբաթվանից ավելի երկար առանց բժշկի խորհրդատվության: Եթե Դուք ունեք երկարատև բուժման կարիք՝ Ձեր բժիշկը կարող է նշանակել ավելի թույլ ստերոիդային նրբաքսուք կամ քսուք:
• Եթե մաշկի վիճակը 2-4 շաբաթվա ընթացքում չի բարելավվում՝ դիմեք Ձեր բժշկին:
• Ախտածին միկրոօրգանիզմները կարող են նպաստել վարակի զարգացմանը տաք և խոնավ պայմաններում՝ օկլյուզիվ վիրակապերի տակ: Մշտապես լվացեք մաշկը նոր վիրակապ դնելիս՝ մաշկային վարակների կանխարգելման նպատակով:
• Եթե քսում եք նրբաքսուքը ուրիշ մեկի մաշկին՝ նախքան քսելն ինչպես հարկն է լվացեք ձեռքերը կամ աշխատեք միանգամյա օգտագործման ձեռնոցներով:

1. Լվացեք ձեռքերը
2. Քսեք նրբաքսուքը բարակ շերտով մաշկի ախտահարված մասերին, թեթևակի մերսեք մաշկի մեջ մինչև լրիվ ներծծումը: Դուք կարող եք դեղաչափել Կլոբետազոլը մատների ծայրին քսելով: Դեղաչափման համար երեխաները պետք է օգտագործել ավելի քիչ նրբաքսուք, բայց ամեն դեպքում օգտագործեք մեծահասակի մատը, որպես դեղաչափման միավոր:
3. Նրբաքսուքը քսելուց հետո մանրակրկտորեն լվացեք ձեռքերը բացի այն դեպքերի, երբ ախտահարված են ձեռքերի մաշկային ծածկույթները և հանդիսանում են նրբաքսուքի քսելու հատված:

Համապատասխան դեղաչափերի համար տե՛ս դեղի ներդիր-թերթիկը:

• Չի կարելի օգտագործել 1 տարեկանից փոքր երեխաների շրջանում
• Հատկապես երեխաների շրջանում կարևոր է չգերազանցել նշանակված դեղաչափը:
• Բուժման կուրսը չպետք է գերազանցի 5 օրը՝ բացառությամբ այն դեպքերի, երբ Ձեր բժիշկը նշանակել է բուժման ավելի երկարատև կուրս: Ձեր բժիշկը կարող է ամեն շաբաթ նշանակել խորհրդատվություն Ձեր երեխային:
• Օկլյուզիվ վիրակապերի կամ բինտերի կիրառումը այն հատվածներում, որտեղ քսված է նրբաքսուքը երեխաների շրջանում խորհուրդ չի տրվում:

Եթե Դուք ունեք փսորիազ

Եթե Դուք ունեք փսորիատիկ բշտիկներ արմունկներին կամ ծնկներին՝ Ձեր բժիշկը կարող է խորհուրդ տալ նրբաքսուքը քսել օկլյուզիվ վիրակապի տակ: Սակայն դա խորհուրդ է տրվում, եթե նրբաքսուքն օգտագործում են գիշերը՝ ազդեցության ուժեղացման համար: Կարճ ժամանակ անց անհրաժեշտ է վերադառնալ նրբաքսուքի օգտագործման սովորական ռեժիմին:

Եթե Դուք օգտագործում եք Կլոբետազոլ դեղը դեմքի մաշկային ծածկույթի վրա

Դուք կարող եք քսել նրբաքսուքը դեմքին միայն բժշկի խորհրդով: Խորհուրդ չի տրվում օգտագործել 5 օրից ավելի, քանի որ դեղի երկարատև կիրառումը կարող է հանգեցնել մաշկի բարակելուն: Վիրակապերը և բինտերը խորհուրդ չի տրվում օգտագործել դեմքի վրա այն հատվածներում, որտեղ քսվել է նրբաքսուք:

Խուսափեք Կլոբետազոլ դեղի շփումից աչքերի հետ

Եթե դա տեղի է ունեցել՝ լվացեք աչքերը առատ ջրով:

Եթե գերազանցել եք դեղաչափը՝ օգտագործել եք ավելի շատ նրբաքսուք, քան թույլատրելի է

Եթե Դուք օգտագործել եք չափից շատ նրբաքսուք կամ պատահաբար կուլ եք տվել՝ անհապաղ դիմեք բժշկին կամ մոտակա հիվանդանոցի շտապ օգնության բաժանմունք:

Եթե մոռացել եք քսել Կլոբետազոլ դեղը

Եթե մոռացել եք քսել դեղի հերթական դեղաչափը՝ քսեք այն հիշելուն պես: Եթե արդեն հերթական օգտագործման ժամն է՝ սպասեք այդ ժամանակին և դրանից հետո օգտագործեք դեղը: Մի՛ օգտագործեք հավելյալ դեղաչափ բաց թողնվածը լրացնելու համար:

Եթե Դուք դադարեցնում եք Կլոբետազոլ դեղի օգտագործումը

Եթե Դուք կանոնավոր կերպով օգտագործում եք Կլոբետազոլ և ցանկանում եք դադարեցնել դրա կիրառումը՝ Դուք պետք է խորհրդակցեք Ձեր բժշկի հետ նախքան դա անելը, քանի որ Ձեր վիճակը կարող է կտրուկ վատանալ դեղի կիրառման կտրուկ դադարեցման դեպքում:

Ինչպես և այլ դեղերը՝ Կլոբետազոլը կարող է առաջացնել կողմնակի ազդեցություններ, սակայն դրանք դրսևորվում են ոչ բոլորի մոտ:

Դադարեցրեք Կլոբետազոլի օգտագործումը և անհապաղ տեղեկացրեք Ձեր բժշկին, եթե.

• Նկատում եք, որ Ձեր մաշկի վիճակը վատանում է, Ձեզ մոտ զարգանում է տարածուն ցան կամ Ձեր մաշկն այտուցվում է բուժման ընթացքում: Հնարավոր է, որ Դուք ունեք ալերգիա Կլոբետազոլի նկատմամբ և կա վարակ կամ անհրաժեշտ է այլ բուժում:
• Ունեք փսորիազ և մաշկի տակ առկա են թարախով լցված բշտիկներ: Դա կարող է դիտվել շատ հազվադեպ բուժման ժամանակ կամ դրանից հետո և հայտնի է որպես պուստուլյոզ փսորիազ:

Այլ կողմնակի ազդեցություններ

Ընդհանուր (1/10)

• Այրոցի զգացում, ցավ, գրգռվածություն կամ քոր նրբաքսուքի կիրառման տեղում

Հազվադեպ (1/100)

• Մաշկի բարակում, ինչը կարող է ստրիաների առաջացման պատճառ դառնալ
• Մաշկի մակերեսային արյունատար անոթոները կարող են դառնալ ավելի նկատելի

Շատ հազվադեպ (1/10000)

Դեղի երկարատև օգտագործումը կամ օկլյուզիվ վիրակապերի տակ կիրառումը կարող են հանգեցնել հետևյալ ախտանիշներին

• Մարմնի զանգվածի մեծացում
• Դեմքի կլորացում
• Ճարպակալում
• Դեմքի հյուծվածություն
• Մաշկի կնճռոտում
• Մաշկի չորություն
• Մաշկի գույնի փոփոխություն
• Մարմնի վրա մազերի քանակության մեծացում
• Մազաթափություն, աճի կանգնում, մազերի վնասում

Այլ շատ հազվադեպ մաշկային ռեակցիաներ.

• ալերգիկ ռեակցիաներ օգտագործման տեղում
• վիճակի վատացում
• գրգռվածություն և ցավ կիրառման տեղում
• կարմրություն
• ցան կամ եղնջացան
• եթե ունեք փսորիազ՝ Ձեր մաշկի տակ կարող են լինել թարախային բշտիկներ: Դա կարող է արտահայտվել բուժման ժամանակ կամ բուժումից հետո և հայտնի է որպես պուստուլյոզ փսորիազ
• մաշկային վարակներ
• ակնե

Երեխաների մոտ ուշադրություն դարձրեք հետևյալ ախտանիշներին.

• քաշի ավելացման դանդաղեցում
• աճի դանդաղեցում

Շատ հազվադեպ կողմնակի ազդեցություններ, որոնք կարող են ի հայտ գալ արյան հետազոտության կամ բժշկի զննման արդյունքում

• Արյան մեջ կորտիզոլ հորմոնի ցածր մակարդակ
• Արյան կամ մեզի մեջ շաքարի մակարդակի բարձրացում
• Բարձր զարկերակային ճնշում
• Ներակնային ճնշման բարձրացում (գլաուկոմա)
• Ոսկորների թուլացում հանքային աղերի աստիճանաբար կորստի պատճառով (օստեոպորոզ): Պլանային բժշկական հետազոտությունից հետո կարող են անհրաժեշտ լինել լրացուցիչ թեստեր այս վիճակը հաստատելու համար:

• Դեղը պահեք երեխաների համար անհասաանելի, զով, խոնավությունից և լույսից պաշտպանված վայրում:
• Դեղի պիտանիության ժամկետը 3 տարի է: Մի՛ օգտագործեք դեղը տուփի և բլիստերի վրա նշված պիտանիության ժամկետի ավարտից հետո: Պիտանիության ժամկետն ավարտվում է նշված ամսվա վերջին օրը: Պիտանիության ժամկետը բացելուց հետո՝ 6 ամիս:
• Դեղերը չի կարելի նետել կոյուղի կամ կենցաղային թափոնների մեջ: Չօգտագործված դեղերի հետ վարվելու մասին հարցրեք դեղագետին: Այս միջոցառումներն ուղղված են շրջակա միջավայրի պահպանությանը:

Ինչ է պարունակում Կլոբետազոլ դեղը

Կլոբետազոլ 0.05% նրբաքսուք դեղի յուրաքանչյուր գրամը պարունակում է.

ակտիվ բաղադրատարր՝  կլոբետազոլի պրոպիոնատ՝ 0.5 մգ

օժանդակ նյութեր՝ ցետեարետ-12, ցետեարետ-20, ցետոստեարիլ սպիրտ, հեղուկ պարաֆին, պրոպիլենգլիկոլ, դիմետիկոն, մեթիլպարաբեն, պրոպիլպարաբեն, էթիլ սպիրտ, մաքրված ջուր:

Ինչ տեսք ունի Կլոբետազոլ դեղը և ինչ է պարունակում փաթեթը

Սպիտակ, անհոտ նրբաքսուք

0.05 % նրբաքսուք արտաքին օգտագործման համար՝ լցված 15 գ տարողությամբ ալյումինե պարկուճում, որը ներդիր-թերթիկի հետ տեղադրված է ստվարաթղթե տուփի մեջ:

Դեղատոմսով