icon-menu
icon-menu

Արտադրանքներ

    Տրիֆտազին, 5 մգ դեղահատեր

    ԴեղաձեվըԴեղահատեր

    ATC խումբՆյարդաբանություն: Հոգեբանություն

    ATC ենթախումբՆեյրոլեպտիկներ

    Դեղի առևտրային անվանումըՏրիֆտազին

    Դեղի միջազգային անվանումըՏրիֆլուոպերազին (Trifluoperazine)

    Ընդհանուր բնութագիրը

    Հիմնական ֆիզիկաքիմիական հատկությունները.

    Կապույտ գույնի թաղանթապատ դեղահատեր:

    Բաղադրությունը

    Յուրաքանչյուր դեղահատը պարունակում է.

    Ակտիվ բաղադրանյութ` 5մգ տրիֆլուոպերազին (6 մգ տրիֆլութպերազինի հիդրոքլորիդ):
    Օժանդակ բաղադրանյութեր` կորիզ՝ միկրոբյուրեղային ցելյուլոզ, լակտոզ մոնոհիդրատ, պովիդոն, եգիպտացորենի օսլա, մագնեզիումի ստեարատ, նատրիումի օսլայի գլիկոլատ, մաքրված տալկ;
    թաղանթ՝ հիպրոմելոզա, պրոպիլենգլիկոլ, տիտանի դիօքսիդ, կապույտ ներկանյութ (ադամանդե կապույտ):

    Քիմիական անվանումը և CAS համարը

    10-[3-(4-մեթիլ-1-պիպերազինիլ)պրոպիլ]-2-(տրիֆտորմեթիլ)-10Н-ֆենոթիազին դիհիդրոքլորիդ, 440-17-5.

    Դեղաբանական խումբը և ԱԲՔ կոդը

    Հակահոգեգարային դեղամիջոց, N05AВ06

    Դեղաբանական ազդեցությունը

    Տրիֆտազինը Ֆենոթիազինի պիպերազինային ածանցյալ է: Ենթադրվում է, որ ֆենոթիազինների հակահոգեգարային ազդեցությունը պայմանավորված է գլխուղեղում հետսինապսային մեզոլիմբիկ դոֆամիներգիկ ընկալիչների պաշարմամբ:

    Տրիֆտազինը ունի արտահայտված հակափսխումային հատկություն, որի կենտրոնական մեխանիզմը կապված է ուղեղիկի տրիգերային գոտու դոֆամինային D2 քեմոընկալիչների ճնշման կամ պաշարման հետ, իսկ ծայրամասային մեխանիզմը` աղեստամոքսային ուղում թափառող նյարդի պաշարման հետ: Օժտված է ալֆա-ադրենոպաշարիչ ակտիվությամբ: Բարձր դեղաչափերի դեպքում ցուցաբերում է արտահայտված հակահոգեգարային ազդեցություն (կասեցնում է հալյուցինատոր-զառանցանքային վիճակը): Հակախոլիներգիկ ակտիվությունը և հակագերճնշումային ազդեցությունը թույլ են արտահայտված: Ցուցաբերում է արտահայտված արտաբրգային ազդեցություն: Չի ցուցաբերում հակահիստամինային, հակացնցումային և կծկանքալույծ ազդեցություն:

    Ֆարմակոկինետիկա

    Ներս ընդունելիս ներծծվում է ամբողջովին: Առավելագույն խտությունը (Cmax) հասունանում է 1.5 – 6 ժամ անց: Նկատվում են արյան պլազմայում առավելագույն խտության անհատական տատանումներ: Սպիտակուցների հետ կապումը բարձր է՝ 99 %-ից ավել: Թափանցում է հեմատոէնցեֆալիկ պատնեշով, արտազատվում է կրծքի կաթի հետ:

    Գրեթե ամբողջությամբ նյութափոխանակվում է լյարդում: Կիսատրոհման պարբերությունը (T1/2) կազմում է 22 ժամ: Հիմնականում օրգանիզմից արտահանվում է լեղաթթվի մետաբոլիտների և մեզի միջոցով: Մեզի հետ անփոփոխ ձևով արտազատվում է 1%-ից քիչ:

    Ցուցումներ

    – Շիզոֆրենիա և այլ հոգեկան խանգարումներ,

    – հոգեշարժական և էմոցիոնալ գրգռման, կատաղի կամ վտանգավոր իմպուլսիվ պահվածքի կարճատև բուժում (որպես լրացուցիչ բուժման միջոց),

    – ծանր տագնապի կարճատև բուժում (որպես լրացուցիչ բուժման միջոց),

    – սրտխառնոցի և փսխման ախտանշային բուժում:

    Դեղաչափավորումը և կիրառման եղանակները
    Շիզոֆրենիայի և այլ հոգեկան խանգարումների, հոգեշարժական և էմոցիոնալ գրգռման, կատաղի կամ վտանգավոր իմպուլսիվ պահվածքի կարճատև բուժման դեպքում.
    – Մեծահասակների և մինչև 12 տարեկան երեխաների սկզբնական դեղաչափը կազմում է 5մգ յուրաքանչյուր 12 ժամը մեկ անգամ: Մեկ շաբաթ անց դեղաչափը կարող է ավելացվել 5մգ/օր, այնուհետև երեք օրը մեկ (կախված հիվանդի վիճակից):

    Սուր տագնապային վիճակի կարճատև բուժում.

    – Մեծահասակներին և մինչև 12 տարեկան երեխաներին` օրական 2-4մգ՝ մի քանի ընդունմամբ: Անհրաժեշտության դեպքում դեղաչափը կարող է հասնել մինչև օրական 6մգ-ի:
    – 3 – 5 տարեկան երեխաներին` օրական 1մգ մի քանի ընդունմամբ:
    – 6 – 12 տարեկան երեխաներին` օրական մինչև 4մգ մի քանի ընդունմամբ:

    Սրտխառնոցի և փսխման ախտանշային բուժման դեղաչափավորումը նույնն է, ինչ տագնապի դեպքում:

    Տարեցներին սկզբնական դեղաչափը պետք է նվազեցնել, առնվազն, կիսով չափ, պետք է ցուցաբերել զգուշություն՝ պայմանավորված այս խմբի հիվանդների հատուկ զգայունությամբ, հատկապես, դեղի հակագերճնշումային և արտաբրգային ազդեցությաւն նկատմամբ:

    Կողմնակի ազդեցություններ
    Բոլոր կողմնակի ազդեցությունները ունեն անցողիկ բնույթ և կախված են դեղի դեղաչափից (սովորաբար նկատվում են 6 մգ դեղաչափը գերազանցելիս):

    Արտաբրգային խանգարումներ

    – Պարկինսոնիզմի ախտանիշներ (ներառյալ, դող)` սովորաբար նկատվում է մեծահասակ և տարեց հիվանդների մոտ և զարգանում է աստիճանաբար,

    – դիստոնիա (դեմքի և մարմնի ոչ նորմալ շարժում) և դժվարաշարժություն (դիսկինեզիա), որը սովորաբար նկատվում է երեխաների և երիտասարդ չափահասների մոտ բարձր դեղաչափի ընդունման դեպքում,

    – ակատիզիա (անհանգստություն), որը նկատվում է սկզբնական բարձր դեղաչափեր ընդունելիս և հիշեցնում է այն հիվանդության ախտանիշների սրացում,որի դեմ հիվանդը բուժվում է,

    – հետաձգված դժվարաշարժություն (լեզվի, դեմքի, ծնոտի ակամա ռիթմիկ շարժում), որը սովորաբար զարգանում է երկարատև ընդունման կամ բարձր դեղաչափերի դեպքում,բայց կարող է զարգանալ նաև ցածր դեղաչափի կարճատև ընդունման դեպքում, կարճատև հետաձգված դժվարաշարժություն կարող է նկատվել նաև դեղի ընդունումը ընդհատելու դեպքում:

    ԿՆՀ-ի և ծայրամասային նյարդային համակարգի կողմից `գլխապտույտ, գլխացավ, թուլություն, քնկոտություն, անհանգստություն, գրգռվածություն, անքնություն, ցնցումներ, գիտակցության շփոթմունք, շատ հազվադեպ` չարորակ նեյրոլեպտիկ համախտանիշ (գիտակցության անկայունություն, մկանների անշարժություն, դիզավտոնոմիա գունատության հետ, հաճախասրտություն, անկայուն արյան ճնշում, քրտնազատություն, անմիզապահություն):

    Հակամուսկարինային ազդեցություն` բերանի չորություն, փորկապություն, միզարտադրության դժվարություն, տեսողության ոչ հստակություն, շատ հազվադեպ՝ փականկյունային գլաուկոմա:

    Ջերմակարգավորման համակարգի կողմից՝ հիպո- և հիպերթերմիա (հատկապես մեծահասակների մոտ ):

    Սրտանոթային համակարգի կողմից ` հաճախասրտություն, զարկերակային թերճնշում, սրտի ռիթմի խանգարում, փոփոխություններ էլեկտրասրտագրության մեջ:

    Ներզատական համակարգի կողմից ` դաշտանի խախտում, կաթնահոսություն, գինեկոմաստիա, սեռական անկարություն/իմպոտենցիա, գիրացում:

    Արյունաստեղծ համակարգի կողմից` թրոմբոցիտոպենիա, լեյկոպենիա, ագրանուլոցիտոպենիա, պանցիտոպենիա:

    Մարսողական համակարգի կողմից` աղեստամոքսային հիվանդություններ, անախորժակություն, լեղականգային դեղնախտ:

    Ալերգիկ ռեակցիներ` մաշկային ցան, եղնջացան, լուսազգայունություն:

    Այլ նշաններ` քթի փակվածություն, աչքի եղջրաթաղանթի և ոսպնյակի խավարում, շաղկապենու և ցանցենու, ինչպես նաև մաշկի եղջրաթաղանթի կարմրեցում:

    Հակացուցումներ
    – Կոմային և դեպրեսիվ վիճակներ,

    – լյարդի և/կամ երիկամների ֆունկցիայի արտահայտված խանգարումներ,

    – ֆեոքրոմոցիտոմա,

    – արյունաստեղծման խանգարումներ,

    – հղիություն և կաթնարտադրության շրջան,

    – մինչև 3 տարեկան մանկական հասակ,

    – գերզգայունություն տրիֆլուոպերազինի և դեղի այլ բաղադրամասերի նկատմամբ:

    Հատուկ ցուցումներ
    Տրիֆտազինը զգուշությամբ է պետք է օգտագործել փականկյունային գլաուկոմայի, միաստենիայի, շագանակագեղձի բարորակ հիպերպլազիայի, ֆենոթիազինային շարքի այլ դեղերի նկատմամբ գերզգայունության դեպքում:

    Տրիֆտազինը զգուշությամբ են նշանակում տարեց հիվանդներին, քանի որ այդ խմբի հիվանդների մոտ առավել բարձր է հակագերճնշումային և արտաբրգային ազդեցության առաջացման վտանգը:

    Տրիֆտազինը զգուշությամբ են նշանակում սրտանոթային հիվանդությամբ տառապող հիվանդներին, այդ թվում սրտային ռիթմի խախտման և կրծքահեղձուկի դեպքում:

    Կրծքահեղձուկի նոպաների հաճախականության կամ արտահայտվածության ավելացման դեպքում դեղի ընդունումը հարկավոր է ընդհատել:

    Արյան պատկերի ախտաբանական փոփոխությունների, լյարդի և երիկամների ֆունկցիայի խախտման, ինչպես նաև ալկոհոլային թունավորման, Ռեյի համախտանիշի, կաթնագեղձի ուռուցքի , պարկինսոնյան հիվանդության, ստամոքսի և տասներկումատնյա աղու խոցային հիվանդության, միզակապության, շնչառական օրգանների քրոնիկ հիվանդությունների (հատկապես երեխաների մոտ) դեպքերում Տրիֆտազինը նշանակելիս հարկավոր է հաշվի առնելով օգուտ-վնաս փոխհարաբերությունը :

    6 մգ դեղաչափը գերազանցելիս ավելանում է արտաբրգային խանգարումների առաջացման հավանականությունը: Որպես կանոն, արտաբրգային խանգարումների անցնկացնելու համար բավական է դեղաչափի նվազեցումը կամ դեղի օգտագործման ընդհատումը կամ հակախոլիներգիկ և հակապարկինսոնային դեղամիջոցների նշանակումը:

    Ֆենոթիազինի ածանցյալները իջեցնում են ցնցումային զգայունության շեմը, ուստի տրիֆտազինը զգուշությամբ է պետք նշանակել էպիլեպսիայով հիվանդներին:

    Էքստրեմալ ջերմային գոտիներում ապրող հիվանդներին դեղը նշանակելիս հարկավոր է զգուշություն ցուցաբերել, քանի որ Տրիֆտազինի ընդունման ֆոնի վրա հնարավոր է տեղի ունենա ջերմակարգավորման ռեակցիայի խանգարումներ :

    Տրիֆտազինի հակափսխումային ազդեցությունը կարող է խեղաթյուրել այն օրգանական հիվանդությունների կլինիկական պատկերը, որոնք արտահայտվում են սրտխառնոցով, փսխմամբ, ինչպես նաև քողարկել այլ դեղերի գերդեղաչափավորման ախտանիշները:

    Չարորակ նեյրոլեպտիկա համախտանիշը նեյրոլեպտիկներով բուժման կյանքին սպառնացող բարդություն է, որի առաջին իսկ ախտանշանների ի հայտ գալու դեպքում Տրիֆտազինի ընդունումը պետք է անմիջապես դադարեցնել:

    Անհրաժեշտ է խուսափել տրիֆտազինի՝ կլանող հակալուծողական դեղերի հետ միաժամանակյա կիրառումից :

    Բուժման ընթացքում խորհուրդ է տրվում խուսափել արևի ճառագայթների անմիջական ազդեցությունից:

    Բուժման ընթացքում պետք է բացառել ալկոհոլի օգտագործումը:

    Անհրաժեշտ է զգուշություն ցուցաբերել այն հիվանդների նկատմամբ, որոնք ունեն գլյուկոզայի կամ գալակտոզայի ներծծման խանգարումներ, գալակտոզեմիա կամ լակտազային անբավարարություն, քանի որ յուրաքանչյուր դեղահատ պարունակում է 29.35 մգ լակոզ:

    Ազդեցությունը ավտոմեքենա վարելու ունակության և մեխանիզմների կառավարման վրա.
    Բուժման ընթացքում անհրաժեշտ է խուսափել ուշադրության գերլարում և հոգեշարժական ռեակցիաների արագություն պահանջվող գործունեությունից:

    Հղիությունը և կրծքով կերակրումը
    Տրիֆտազինի օգտագործումը հղիության և կաթնարտադրության շրջանում հակացուցված է:

    Դեղորայքային փոխազդեցություններ
    Տրիֆտազինի միաժամանակյա օգտագործումը ոսկրածուծի ֆունկցիան ճնշող դեղերի հետ ավելացնում է դեղի թունայնության առաջացման ռիսկը:

    Տրիֆտազինի ընդունումը զարկերակային թերճնշում առաջացնող դեղերի հետ (ԱՓՖ-ի արգելակիչ, ալֆա- և բետա- ադրենոպաշարիչներ, ընդանուր անզգայացնողներ, ափիոնային ցավազրկողներ, անգիոտենզին II ընկալիչների ներհակորդներ, կալցիումական ուղիների պաշարիչներ, կլոնիդին, դիազքքսիդ, միզամուղներ, մեթիլդոպա, մոքսինիդին, նիտրատներ, սիմպատոխթանիչներ, հիդրալազին, մինօքսիդիլ կամ նատրիումի նիտրոպրուսիդ) կարող է առաջացնել արտահայտված օրթոստատիկ հիպոտենզիա:

    Տրիֆտազինի ներծծումը խախտվում է թթվամարիչների և կաոլինի միաժամանակ օգտագործման դեպքում: ԿՆՀ ճնշող դեղերի հետ (ափիոնային ցավազրկողներ, սիբուտրամին), ինչպես նաև էթանոլի և էթանոլ պարունակող դեղերի հետ միաժամանակ օգտագործման դեպքում հնարավոր է ԿՆՀ դեպրեսիա ուժեղացում և շնչառության ընկճում:

    Տրիֆտազինը հակաառիթմիկ դեղերի հետ նշանակելիս ( մոքսիֆլոքսացին, պիմոզիդ, ատոմօքսետին, սոտալոլ, պենտամիդին իզոթիոնատ ) բարձրանում է փորոքային էքստրասիստոլաների առաջացման վտանգը:

    Եռացիկլիկ հակադեպրեսանտների հետ (մապրոտիլին կամ ՄԱՕ-ի արգելակիչներ) միաժամանակյա ընդունման դեպքում հնարավոր է չարորակ նեյրոլեպտիկ համախտանիշի առաջացման վտանգի մեծացում:

    Միաժամանակյա ընդունման դեպքում տրիֆտազինը հակազդում է սուլֆոնիլմիզանյութի ածանցյալների հիպոգլիկեմիկ ազդեցությանը:

    Տրիֆտազինի՝ հակացնցումային դեղերի հետ (կարբամազեպին, էտոսուկսիմիդ, օքսկարբազեպին, ֆենիտոին, պրիմիդոն, վալպրոատ, բարբիտուրատներ) ընդունման դեպքում հնարավոր է ցնցումային շեմի ցածրացում:

    Հակամուսկարինային դեղերի հետ ընդունման դեպքում նվազում է տրիլուոպերազինի խտությունը պլազմայում, սակայն բարձրանում է հակամուսկարինային դեղերի կողմնակի ռեակցիաները առաջացման վտանգը:

    Հակավիրուսային դեղերի հետ Տրիֆտազին ընդունելիս մեծանում է տրիլուոպերազինի խտությունը պլազմայում:

    Տագնապամարիչների և քնաբեր դեղերի հետ միաժամանակ կիրառելիս մեծանում է անդորրաբեր ազդեցությունը:

    Արտաբրգային ռեակցիաներ առաջացնող դեղերի հետ միաժամանակ տրիֆտազին ընդունելիս (ամանտադին, լիթիում պարունակող դեղեր, մեթիլդոպա, մետոկլոպրամիդ, տետրաբենազին) հնարավոր է արտաբրգային խախտումների հաճախականության և ծանրության ավելացում:

    Տրիֆտազինը կարող է ճնշել ապոմորֆինի, լեվոդոպայի, պերգոլիդի, բրոմոկրիպտինի, կաբերգոլինի, պրամիպեկսոլի , ռոպինիրոլի, ռոտիդոտինի, նատրիումի օքսիբատի ազդեցությունը: Մեմանտինը և ցիմետիդինը կարող են ընկճել Տրիֆտազինի ազդեցությունը:

    Պիտանելիության ժամկետը
    Պիտանելիության ժամկետը` 3 տարի: Չօգտագործել պիտանելիության ժամկետը սպառվելուց հետո:

    Դեղատնից բացթողման կարգը
    Բաց է թողնվում դեղատոմսով:
    Թողարկման ձևը և փաթեթավորումը
    48 դեղահատ պարունակող ստվարաթղթե տուփ (2 բլիստեր 24-ական դեղահատ պարունակող):
    Պահման պայմանները
    Պահել երեխաների համար անհասանելի, զով, խոնավությունից ու լույսից պաշտպանված տեղում: